O DÍA DA PAZ

O luns 30 celebramos como é costume o Día da Non Violencia e a Paz no Colegio Vigo. Como xesto de benvida ao evento, os alumnos de 2º de Bacharelato recibiron aos seus compañeiros e profesores con fortes aplausos e ovacións facendo un divertido corredor que animaba a todos os presentes a entrar no salón de actos. Este ano, baixo o lema, “Fronte ó acoso non te pares”, toda a comunidade educativa implicouse de maneira excepcional con este tema que por desgraza é actualidade. O evento comezou coa proxección dun mannequin challenge moi especial, onde todos os alumnos do centro, desde Infantil ata Bacharelatos, pasando pola ESO, FPBásica e Ciclos Medios  foron os protagonistas. Neste vídeo aparecían escenificadas diversas situacións de acoso que remataban cun grito unánime: “Fronte o acoso, non te pares” e un único pensamento: “ actúa, denuncia e non quedes estático”.

O acto continuou cunha fermosa canción interpretada polos alumnos de Infantil, primeiro e segundo de Primaria na que invitaban aos presentes a xogar. Baixo o título Vamos a jugar a ser mejor, o salón de actos do Colegio Vigo tocou palmas e coreou aos intérpretes.

Como é xa tradicional, un representante de cada curso leu para todos o lema de paz  da súa clase. Estes propósitos de paz viñan en formato emoticono, e  acabaron presidindo o acto conmemorativo nun gran cartel no centro do escenario.

Por último, mentres coreamos todos xuntos o rap de El Langui, Se buscan valientes, varias ducias de globos invadiron o salón dando así por finalizada a nosa especial celebración do día da paz.